談戀愛就好似食河豚咁，肉質鮮嫩，但稍一處理不慎清洗唔乾淨食到內臟，手腳麻痺，腸穿肚爛，由頭毒到落腳。
比食河豚更恐怖嘅係，自己原來已經中咗毒都唔知，當發現徵狀時，身體已失去平衡，喺地上喊得抖震，彷彿要挖個窿將自己活埋，先可以解毒。
呢個時候，已水浸嘅眼角出現了一雙手。呢雙手比男人的還要強壯，扶起身來，捉緊一對臂彎。奇怪，體温測35.5度，比阿媽成日發熱嘅手要涼一啲。
「起身吧！我哋坐低慢慢傾......」於是乎，由夜晚陪我坐公園到清晨，紙巾遞上一張又一張，對手俾蚊咬到豬蹄咁都冇半句怨言。
「出嚟陪吓我啦！」其實係佢陪我，陪我食飯睇戲兼唱K，隔個星期再打邊爐直踩摸住酒杯底傾到日出，兩個癲婆喺街上喪笑，嚇到報紙檔阿叔目定口呆。
學人玩斷捨離，點知敗得我傷痕纍纍，如是者陀住個B，啲氧氣都唔知夠泵上腦定泵落肚，照樣飲住牛奶陪我坐café 傾計聽我吐苦水到半夜。
出嚟行走江湖，冇辦法可時常見到佢哋，但我知道佢哋一直都會喺呢度。我嘅閨蜜都唔喺身邊，但係一個電話，威力之大亦可幫我format個腦，清走屯積喺個腦裡糾纏咗好耐嘅virus。
今日完整無缺的我，唔係喺最好嘅時光遇見你哋，而係有你哋喺我生命裡存在，我先有今日美好嘅時光。
喺一生中同自己擦身而過嘅人好多好多；
由同學同事變為朋友的，得閒飲茶的有好多；保持聯絡間中交換行程的有不過唔多；
陪自己渡過多少無眠嘅夜晚，推心置腹，
將你每個人生轉捩點都可倒背如流的，在真不在多，請好好珍惜。
Search